DAN ULDUZU دان اولــــــــــــــدوزو
دان اولدوزو ايستير چيخا گؤز يالواري چيخما
هر زامان كي باخيرام باشينا قار وار گؤرورم
اوغلو اؤلموش آنا تك گؤزلرين آغلار گؤرورم
هر طرفدن چكيليب سينه وه داغلار گؤرورم
آي آلان اوستونو غم چيسگيني هرياني دومان
آي ياغان باشينا غملر اودو ياسلي ساوالان
عصرلر كئچدي سنين گولمه دي بير لحظه اوزون
قانلي ياش توكدو سارالميش اوزونه ياشلي گؤزون
غصه دن دؤندو قارانليق گئجه اولدو گونوزون
نه سوران حاليني اولدو نه وئرن جسميوه جان
آي ياغان باشينا غملر اودو ياسلي ساوالان
ساكيت اول آغلاما قوي بيرجه چكيلسين بو دومان
گون چيخيب ظولمتي بير يوللوغا قووسون بورادان
نبي گلسين بوز آت اولسون يئنه داغلار آتيلان
هجرين بلكه ييغيلسين گؤزو يولدان آنا جان
آي ياغان باشينا غملر اودو ياسلي ساوالان
بابكين گئدديسه بوش قالمادي آما قوجاغين
دولودور مين ائله اوغلانلارايله هر بوجاغين
نه قه در يئل اسه طوفان قوپاسؤنمز اوجاغين
آي بلالر سپري خالقا يامان گونده آمان
آي ياغان باشينا غملر اودو ياسلي ساوالان
چنلي بئلده دلي لر قوي يئنه قورسون بوساطي
قوچ كوراوغلو يئنه جوولانه گتيرسين قيرآتي
هئچ زامان اصلين ايتيرمز اوكي دوزگوندو ذاتي
آند اولا آديوا اي گؤزلري آغلار ياشي قان
آي ياغان باشينا غملر اودو ياسلي ساوالان
آند وئررم سني او قانه بلنميش داشيوا
گئجه گوندوز او گؤزوندن تؤكولن قان ياشيوا
اورگين درديني بيلدير او سهند قارداشيوا
سني وارليق سني تانري سني بو آه و فغان
آي ياغان باشينا غملر اودو ياسلي ساوالان
بابالاردان بيزه قالميش بو مثل هامي بيلر
سو گلن آرخا دئييب لر يئنه بيرگون سو گلر
فلگين داش اورگين آه اوخو آخيردا دلر
بارز اوغلوندا يئتر سئوديگي ياره او زامان
آي ياغان باشينا غملر اودو ياسلي ساوالان
عباس بارز
| قالب وبلاگ : قالب وبلاگ |
